ژان و ركمان

ته‌حسین ناڤشكى

ده‌مێ سه‌ددام حسێن ب دیرۆكا 2-8-1990 چۆیه‌ د وه‌لاتێ كوێتێ دا و داگیركرى، ئه‌وێ ل جادده‌یا ئیراقێ د ناڤ خه‌لكى دا دژیا و گوهدارییا راگه‌هاندنا دكتاتۆرى و خیتابێن وى یێن نیمه‌چه‌ رۆژانه‌ دكر، رێك ل به‌ر به‌رزه‌ دبوون، ژ به‌ر كو راگه‌هاندنا ده‌هۆلدڕینا ده‌ستهه‌لاتێ و دیتنا واقعى یا خه‌لكى ژ ئه‌ردى هه‌تا ئه‌سمانى ژ هه‌ڤ دوور بوون. ئانكو پرانیا خه‌لكى دزانى سه‌ددام نه‌شێت خوه ‌ل به‌ر 33 ده‌وله‌تێن مه‌زن ب هه‌موو هێزا خوه‌ یا له‌شكریڤه ب سه‌رۆكاتیا ئه‌مریكا‌ هاتین ده‌ڤه‌رێ بگرت؛ لێ دكتاتۆرى وه‌سا ددیت، دێ وێ زڕه‌ هێزێ ب له‌شكه‌ری خوه‌ یێ هلوه‌شیاى، خه‌لكێ رووت و برسى؛ هێشتا ژ كارتێكرنا سه‌رباركێن شه‌ڕێ ئیرانێ رزگار نه‌بووین، سه‌ركه‌ڤتنێ ب ده‌ستڤه‌ ئینت! ئه‌ڤرۆكه ژى‌ نێزیكه‌ دیمه‌نه‌ك وه‌سا د سیاسه‌تگێڕانا هه‌رێما كوردستانێ دا دوباره‌ دبت. هه‌چیێ گوهدارییا میدیایین حزبێن ده‌ستهه‌لاتا هه‌رێمێ بكه‌ت، دێ هزر كت ده‌ستهه‌لات ل گه‌لییه‌كى دژیت و خه‌لك ل گه‌لییه‌كى دى دژیت؛ ژ به‌ر كو ده‌ستهه‌لاتێ هه‌موو ئێش و ژانێن خه‌لكى پشتگوهكرینه‌‌ و شیوازێ شێلاندنا ره‌وشێ دگه‌ل خه‌لكى ب كاردئینن و ماینه‌ ب شه‌ڕنیخا ناكویێن خوه‌ڤه‌ و شه‌ڕێ ل سه‌ر كورسیكێ و پترۆلێ ژ ئالیه‌كى و كرنا ریفراندۆمێ و بلند كرنا ئالاى ل كه‌ركووكێ ژ ئالییه‌كێ و رۆژ بۆ رۆژێ بووشایى ل ناڤبه‌را وان و خه‌لكى به‌رفره‌هتر لێ دهێت، ژێبوونا ئاخێ و نه‌ته‌وه‌یى كزتر لێ دهێت، پرانییا حزبان یان نزانن یان نه‌ڤێت بزانن و خوه‌ د راستیێ بگه‌هینن، تنێ ل دووڤ ئاراسته‌یا حه‌زێن خوه‌ یێن حزبى یێن به‌رته‌نگ سه‌ره‌ده‌ریێ ب ناڤێ خزمه‌تا نه‌ته‌وه‌یى دگه‌ل واقعى دكن. كه‌واته‌ هه‌ر حزبه‌كا كوردى ئه‌جنده‌یا خوه‌ یا تایبه‌ت هه‌یه‌ داكو د ڤێ شه‌ڕه‌نیخا سیاسییا مالوێران دا بشێت پتر ئه‌نجامان لسه‌ر به‌هرا خزمه‌تا نه‌ته‌وه‌یى و ملله‌تى بده‌ستڤه‌ بینت. هندى پارتییه‌، وه‌ك هێزا ئێكێ ل هه‌رێمێ خوه‌ ب بۆریێ خوه‌یێ سیاسى و هێزا جه‌ماوه‌رى گه‌رم و په‌یوه‌ندیێن خوه‌ یێن نێڤده‌وله‌تى دكت كو ب هه‌ر ره‌نگێ هه‌یى ریفراندۆم بهێت كرن و ده‌وله‌تا كوردى لسه‌ر ده‌ستێ وان بهێت راگه‌هاندن؛ هه‌كه‌ سه‌د سه‌ر بچنه‌ كولاڤه‌كى. ژ ئالیێ خوه‌ ئێكه‌تیێ ژ به‌ر ئاریشه‌یێن خوه‌ یێن ناڤخوه‌یى و نیمچه‌ ئینشقاقا تێدا چێبووى هند ئاگه‌ه ژ پرۆژه‌یێ ده‌وله‌تێ نینه‌ هندى ژ ناكۆیین خوه‌ هه‌یى و شه‌ڕێ لسه‌ر پاره‌ى و كورسیكێ دهێته‌ كرن و نیڤا دارى ل ناڤبه‌را پارتى و گوڕانێ و حزبین دى گرتییه‌ و سه‌رورێك لێ به‌رزه‌بووینه‌، نزانت ل دووڤ كیژان ئالى بچت؟! گۆران ژ ئالیێ خوه،‌ تنێ ئێكی دزانت، ئه‌و ژى نه‌مانا سه‌رۆكێ هه‌رێمێه‌ و ڤه‌ژاندنا په‌رله‌مانیه‌ و ب هه‌ر ره‌نگێ هه‌یى كو هێزا سه‌نته‌رى ژ ده‌ست پارتى ده‌ربێخت؛ ڤێجا پاشى ئه‌وا وێ دڤێت بكت، هه‌كه‌ كوردستان هه‌مى ببته‌ كاڤله‌ك وێران، نۆرماله‌ گرنگ پارتى حوكمى نه‌كت و وه‌ك هێزا ئیكێ نه‌مینت. حزبێن دى ژى تایبه‌ت حزبێن ئیسلامى رێك ل به‌ر وان ژى به‌رزه‌بوویه‌، نه‌دزانن ئۆپۆزسیۆن و نه‌دزانن ده‌ستهه‌لاتن. ئه‌ڤه‌ هه‌مى د ناڤ ره‌وشا ئه‌قلیمى و ده‌ولیا هێشتا دكه‌لت دا دهێته‌ كرن. ژ به‌ر كو ده‌وله‌تێن ئه‌قلیمى و حزبیێن وانێن كوردى مینا په‌كه‌كێ، وان ژى ئه‌جنده‌یین خوه‌ هه‌نه‌ كو ب چو ره‌نگان نه‌هێلن ده‌وله‌تا كوردى ل باشوور ل سه‌ر ده‌ستێ پارتى بهێت راگه‌هاندن.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.